Clara Bilbao

AIMPLASek, AITIIPek, CIDAUTek eta GAIKERek osatzen dute sare hori, eta elikagaietarako ontzien segurtasunerako, garraioaren osagaiak arintzeko eta nekazaritza-praktikak hobetzeko bioplastikoak erabiltzea dute helburu.

MARFIL Sarearen arrakastak lagunduko du petrolioarekiko mendekotasuna murrizten, nekazaritzako azpiproduktuak balorizatzen eta zabortegietara inolako balorizaziorik gabe heltzen diren hondakinen kopurua mugatzen.

AIMPLAS Plastikoaren Institutu Teknologikoak, Garraio eta Energiaren Ikerketa eta Garapenerako Fundazioak (CIDAUT) eta AITIIP eta GAIKER zentro teknologikoek MARFIL Sarea eratu dute, iturri berriztagarrietatik eratorritako bioplastikoak, gehigarriak eta errefortzuak funtsezko sektoreetan material berritzaile gisa erabiltzea bultzatzeko.

Petrolioaren ordezko iturrietatik eratorritako material plastiko horiek eragin txikiagoa dute ingurumenean eta errazago birzikla eta/edo biodegrada daitezke. Horregatik, material industrial asko erabiltzen duten sektoreetan sustatuko dira, hala nola elikagaiak ontziratzeko sektorean, eta baita balio erantsi handiko industria-sektoreetan ere, hala nola garraioan eta nekazaritzan. Helburua da ingurumenaren, teknikaren eta ekonomiaren ikuspuntutik aukerarik onena direnean, haiek askoz ere gehiago erabiltzea.

Horretarako, MARFIL Sareak ikerketa, garapen, berrikuntza eta prestakuntza programa estrategikoa garatuko du, zentro horiek oinarri biologikoko plastikoak garatzeko dituzten gaitasunak indartzeko asmoz, batez ere hondakinak, nekazaritza-industriako azpiproduktuak edo ordezko biomasak erabilita. Lortutako gaitasunak hainbat mailatan erabiliko dira, puntako ikerketa-taldeekiko lankidetza sustatzeko, lehengai eta produktu jasangarrien garapenean industriak duen interesa handitzeko, talentua erakartzeko eta bioplastikoak erabiltzeak zenbait sektoretan dituen ingurumen-abantailei buruz gizartea kontzientziatzeko, hala nola, ontzietako elikagai segurtasunean, garraio-sektorerako osagaiak arintzeko eta nekazaritza-praktikak hobetzeko, betiere hornidura-katearen erresilientzia ziurtatuz.

Helburua da iturri berriztagarrietatik eratorritako polimeroen erabilera 2030ean Espainiako guztizkoaren % 5 baino gehiago izatea (200.000 tona inguru). MARFIL Sarearen arrakastak asko lagunduko du petrolioarekiko mendekotasuna murrizten, nekazaritzako azpiproduktuak balorizatzen (horrela landa-eremuetako despopulazioa murrizten lagunduz) eta zabortegietara inolako balorizaziorik gabe heltzen diren hondakinen kopurua mugatzen.

Hiru ikerketa-ildo nagusi

Hiru ildo nagusi ikertuko dira: nekazaritza industriako biomasaren tratamendu jasangarri eta eskalagarria, biopolimeroak, gehigarriak eta errefortzuak ekoizteko; bere propietateak eta prozesatzeko gaitasuna hobetzea, bioplastikoak polimerizatzeko teknika berrien bidez; eta bere konpostagarritasuna eta birziklagarritasuna handitzea.

Hasieran hiru sektore nagusitan lan egingo bada ere (garraioa eta logistika, ontziratzea, eta nekazaritza eta arrantza), MARFIL Sarearen emaitzak plastikoak erabiltzen dituzten beste sektore batzuetara (eraikuntza, sektore elektriko-elektronikoa, ehungintza eta altzariak) eta balio erantsi handiko industrietara (adibidez, osasuna, bioteknologia eta aeronautiko-aeroespaziala) zabalduko dira.

GAIKERen zeregina

GAIKERek MARFIL Sarearen helburu estrategiko guztietan lagunduko du, biopolimeroek merkatuan duten lehiakortasuna indartzeko. I+G+B garatzeko ildoei dagokienez, Zentro honek Sareko zenbait gaikuntza-eremu zuzentzen ditu:
• Biopolimero mikrobiarrak lortzeko bioprozesuak.
• Polimeroak lortzeko bide berriak eta naturan oinarritutako errefortzuak
• Naturan oinarritutako konpositeen eta tarteko produktuen garapena
• Erakusleen baliozkotze funtzionala, eta bizi-amaierako, biodegradagarritasuneko eta birziklagarritasuneko estrategia berrien azterketa

Sare horri esker, GAIKERek nabarmen handituko du teknologietan duen gaitasuna, eta BIOEKONOMIAn duen zeharkako estrategia sendotuko du, balio-katean gora egin ahal izateko. Horretarako, monomeroak eta materialak eraldatzeko/aldatzeko/sintetizatzeko azken teknologietan trebatu beharko da, eta baita, ondoren, merkatuko eskaeraren araberako funtzionaltasuna eta prozesagarritasuna izateko naturan oinarritutako produktuak garatzeko ere.

Red MARFIL proiektua Zientzia, Berrikuntza eta Unibertsitate Ministerioak argitaratutako 2023ko Bikaintasuneko Zentro Teknologikoen Cervera deialdiaren parte da, eta Suspertze, Eraldatze eta Erresilientzia Planaren Europako funtsekin finantzatuta dago. Garapen Teknologikorako eta Berrikuntzarako Zentroak (CDTI) kudeatzen du programa.

GAIKERen, litio-ioizko bateriak bizitza baliagarriaren amaieran tratatzeko eta birziklatzeko teknologiak eta prozesuak ikertzen eta garatzen ditugu.

Honako lan hauek egiten ditugu:

•    Bateriak identifikatzea eta sailkatzea
•    Bateriak deskargatzea
•    Bateriak desmuntatzea eta elektrodoak ateratzea
•    Black mass estandarra eta purutasun handikoa lortzea
•    Material ez-aktiboak berreskuratzea
•    Material aktiboak hidrometalurgia bidez berreskuratzea
•    Black mass ezaugarritzea

Más información

GAIKERek ontzi arinen hondakinak kudeatzeko eta tratatzeko ereduaren eraldaketa digital adimendunerako oinarriak ezartzeko, ezagutza teknologiko berria sortzen lagundu du

“Hondakinak balorizatzeko sektorearen eraldaketa teknologikoa, Espainiako industrian ekonomia zirkular eraginkorra bultzatzeko” SEPARA proiektua, non GAIKER Zentro Teknologikoak (Basque Research & Technology Alliance, BRTAko kidea) parte hartu duen, arrakastaz amaitu da lau urte ondoren.

Ikerketa zortzi enpresek osatutako partzuergoak egin du, eta Ecoembesek zuzendu du, 1997tik Espainian plastikozko, metalezko, brikezko, egurrezko, paperezko eta kartoizko ontzien birziklapena bultzatzen duen erakundea. Ikerketak emaitza onak lortu ditu, proposatutako helburu tekniko guztiak lortuz, eta hondakinen bereizketaren digitalizazioaren arloan etorkizunean garapenak egiteko oinarri sendoa ezarri du. Esaterako, sistema adimendunak txertatu dira prozesuaren fase guztietan, eta gobernantza digitaleko plataforma bat garatu da. Plataforma horren bidez instalazioak modu automatizatuan kudeatu ahal dira, eta, gainera, premia desberdinak dituzten interes-agenteentzako output ugari sortu ahal ditu .

SEPARA Garapen Teknologikorako Zentroak (CDTI) finantzatu zuen, Enpresa Berrikuntzako Sektoreko Ekimen Estrategikoetarako laguntza-programan (Misiones CDTI), eta ontzi arinen hondakinak hautatzeko instalazioen eraldaketa digital adimenduna ahalbidetuko duten oinarri teknologikoak ezartzera bideratutako ezagutza berria sortzeko helburuarekin sortu zen, haien eraginkortasuna eta produktibitatea handitzeko.

Horretarako, teknologia optiko aurreratuak, sistema robotikoak, adimen artifizialeko algoritmoak eta datu masiboen tratamendurako sistemak ikertu eta baliozkotu dira, hondakinen bilketan, hautaketa-instalazioan (heltzen den hondakina denbora errealean ezaugarritzea, inpropioen triajea, ontzien sailkapena eta berreskuratutako materialen kalitatearen monitorizazioa) eta bilketa – instalazioaren arteko loturaren ingurunean aplikatuta.

Ikerketa horri esker, plastikozko ontziak bereizteko eta birziklatzeko gaitasuna handitu eta modernizatu egin da, eta, beraz, 20185/852 (EB) Zuzentarauak ezarritako helburua lortzeko lagundu du; izan ere, zuzentarau horren arabera, 2030. urterako plastikozko ontzi guztiak birziklatu ahal izango dira.

Proiektuko kideak
SEPARA proiektuan Ecoembes (burua), Minsait, Atria Innovation, Pixelabs, Piperlab, Picvisa, SpectralGeo eta Trienekens enpresek hartu dute parte.

---

Proiektu honek CDTIren dirulaguntza jaso du, Enpresa Berrikuntzako Sektoreko Ekimen Estrategikoetarako laguntza-programaren barruan (Misiones CDTI). Espediente-zenbakia: MIG-20201006

ONTZHI proiektuak hidrogeno gasa biltegiratzeko eta garraiatzeko material berriak eta hidrogenoak biltegiratze- eta garraio-azpiegiturako materialekin duen interakzioa ezaugarritzeko metodo berriak garatzen ditu

GAIKER Zentro Teknologikoak, Basque Research & Technology Alliance – BRTAko kide, “Hidrogenoa biltegiratzeko eta garraiatzeko funtsezko teknologiak, ONTZHI” proiektuan parte hartzen du. Proiektuaren helburua hidrogenoa biltegiratzeko eta garraiatzeko teknologia eta konponbide seguruagoak, trinkoagoak, errentagarriagoak eta jasangarriagoak ikertzea da.

Europar Batasunaren helburua 2023rako berotegi efektuko gasen isuriak % 55 murriztea da, eta 2050erako emisioen neutraltasuna lortzea. Hidrogeno berdea erabiltzea irtenbide bat izan daiteke; izan ere, % 100 garbia den energia-iturria da, energetikoki eraginkorra da, ez du gasik sortzen, eta sortzen duen hondakin bakarra ura da. Baina, horretarako, biltegiratze eta garraio segurua eta errentagarria izan behar da eskala handian, lehiakortasun ekonomikoa bermatu ahal izateko.

Gaur egun, hidrogenoa presiopeko gas moduan biltegiratu eta garraia daiteke tanga eta hodietan, edo likido egoeran tanga kriogenikoetan. Hala ere, bere propietate fisikokimikoak direla eta (beste erregai batzuen propietateetatik nahiko desberdinak dira), zaila da teknologia horiek garatzea, eta ikerketan aurrerapenak egin behar dira, hidrogenoa garraiatu eta biltegiratzeko azpiegiturak garatzeko.  

Egoera horri erantzuteko, 2023an ONTZHI proiektua jarri zen martxan, Eusko Jaurlaritzak finantzatuta (ELKARTEK programa). Proiektu horren helburua hidrogenoa biltegiratzeko eta garraiatzeko konponbideak bilatzea da, eta, horretarako, material berriak eta materialak elementu kimiko horren efektu degradatzailetik babesteko estrategia berriak garatzen ditu.

Proiektuaren bidez, tanga eta hodietako materialen erresistentzia hobetu, pisua eta kostua murriztu, biltegiratze- eta garraio-sistemen segurtasuna eta jasangarritasuna handitu, eta material metalikoek hidrogenoarekiko interakzioan dituzten mugak ikertu eta haiei buruzko ezagutza sortu nahi da. Horren ondorioz, bi erakusle garatuko dira laborategiko eskalan: bata, hidrogenoko babes-estaldurena, eta, bestea, polimero birziklagarriez egindako IV motako H2 biltegiratze-tangarena. Horrez gain, ezaugarritze-metodo sinplifikatuak definitzeko eta garatzeko erabiliko den eredu konputazional bat ere garatuko da.

GAIKERek, nagusiki, mugikortasun-tangetarako soluzioak ematen ditu. Alde batetik, hidrogenoaren aurrean hesi-propietateak dituzten in situ polimeriza daitezkeen material termoplastikoak diseinatzen eta ikertzen ditu, IV motako hidrogeno-tangak egiteko, rotomoldeaketaren bidez linerrak eginez eta filament winding bidez inguratzailea eginez. Eta bestetik, tape formatuko konposite termoplastikoak diseinatzen eta ikerketzen ditu, tape winding robotizatuaren teknologiarekin inguratzaileak egiteko.

ONTZHIk Zientzia, Teknologia eta Berrikuntzaren Euskal Sareak (ZTBES) eta euskal enpresek hidrogenoaren sektorean duten jarrera zientifiko, teknologiko eta komertziala hobetu nahi du, eta, bereziki, hidrogeno berdea garraiatzeko eta biltegiratzeko teknologiei dagokienez.

Eusko Jaurlaritzako Ekonomiaren Garapen, Jasangarritasun eta Ingurumen Sailak diruz lagundutako proiektua (ELKARTEK 2023 programa).

I+G+B jarduerak eta ezagutzaren transferentziaren jarduerak transferentzia-funtzioak egiten dituzten unitateak sortzea bultzatu dute, “Ezagutza Transferitzeko Bulegoak” (OTC) deiturikoak.

OTCen eginkizuna, alde batetik, I+G+B arloan jakintza sortzen dutenen eta industria eta gizartearen arteko harremanak ezartzea da; eta bestetik, ezagutzaren transferentziatik emaitza ekonomiko eta sozialak lortzea.

GAIKERek egitura horren parte izan nahi du, eta OTC gisa erregistratu da, transferentzia eta hedapen teknologikoa bultzatzeko, I+G+B sustatzeko eta inguruko industria eta gizartearekin komunikazioa eragiteko.

OTC-GAIKERek I+G+Baren kudeaketa eta garapena lehiakortasun eta garapen teknologiko tresna gisa bultzatu nahi du enpresen artean, proiektuak burutzen, eta Zentroan garatzen ditugun jardueretan parte hartzea sustatuz.

Gure eginkizunetako batzuk:

• I+G+Bko emaitzak babestea
• Ikerketaren emaitzak ustiatzea
• Erakunde publiko eta pribatuak elkarlanean ikertzea, I+G+B zerbitzuak eta zerbitzu teknologikoak kontratatzea.
• Ezagutzan oinarritutako erakundeak sortzea sustatzea.
• Ezagutza gizartean zabaltzea.