Archives for March 2024

NEOPLAST2 proiektuan euskal industria sareari plastikozko materialen zikloak ixtea ahalbidetuko dioten bideak ikertzen ari dira, birziklatze kimikoko teknologiak erabiliz, hondakinak tratatuz eta balioa duten produktuak sortuz.

GAIKER Zentro Teknologikoa, Basque Research & Technology Alliance – BRTAko kide, NEOPLAST 2 proiektuaren koordinatzailea da. Proiektu horren helburua hainbat hondakin plastiko kalitate handiko baliabide bihurtzen lagunduko duten birziklatze kimikoko prozesuak garatzeko, hobetzeko eta egokitzeko ikertzea da, baliabide horiek bigarren mailako lehengai zorrotzenen merkatuek eskatzen dituzten zehaztapenak bete ditzaten. Kontua da ezagutza sortzea, industria sareak plastikozko materialen erabilera hobea, jasangarriagoa eta zirkularragoa egin dezan.

Hondakin plastikoen kudeaketa hobetzea eskaera orokorra bihurtu da, pertsonengan, ekosistemengan eta ingurune naturalarengan horiek duten eraginagatik. Birziklatze kimikoa konponbidearen zati bat dela baieztatu da, bai ohiko bide mekanikoekin birziklatzeko zailak diren edo birziklatu ezin diren hondakin plastikoak aprobetxatzeko, bai kimikoki birziklatutako eta hasierako lehengaietatik ia bereizi ezin diren produktuak lortzeko.

NEOPLAST 2 proiektua birziklatze kimikoko prozesuak ikertzeko eta garatzeko asmoz sortu zen eta gaur egun produktuak sortzeko eta horien kalitatea hobetzeko fasean dago. Zehazki, kondentsazio-polimeroz osatutako plastikoen solbolisi-erreakzioen edo plastiko-nahasketen pirolisi- eta gasifikazio-prozesuen hautakortasuna handitzeko lanean ari dira, baita substantziak eta frakzioak (monomeroak edo olioak, esaterako) araztea lortzen duten adsortzio- edo erauzketa-eragiketak definitzeko ere. Horrekin, kimikoki birziklatutako plastiko berriak sortzea posible, bideragarria eta ingurumenerako onuragarria dela frogatu nahi dute.

NEOPLAST 2 proiektua (KK-2020/00107 erref.) Eusko Jaurlaritzak finantzatu du 2023 eta 2024 urteetan Elkarlanean egindako Ikerketarako ELKARTEK laguntza-programarekin. GAIKER zentro teknologikoarekin batera (proiektuaren buru dena), beste lau euskal agente teknologiko parte hartzen dute proiektuan: UPV/EHUko Ingeniaritza kimiko eta Ingeniaritza kimiko eta ingurumen sailak, TECNALIA eta POLYMAT. Guztiek ematen dute euren ezagutza hondakin plastikoak bide termokimiko eta solbolitikoen bitartez produktu bihurtzeko, katalisiarekin, prozesuen kontrolarekin, produktuen garbiketarekin edo sintesi kimikoarekin konbinatuta.

Ikerketa honi esker, GAIKERek, birziklatze mekaniko eta kimikoan erreferentzia dena, eta hondakinen karakterizazio eta tratamenduan, produktuen lorpenean, birziklatze eskemen diseinuan eta eragiketa eta prozesuen eskalatzean esperientzia handia duena, ezagutza osoa izango du solbolisi katalitikoaren bidezko birziklatze kimikoa ulertzeko eta eraginkortasunez erabiltzeko. Zehazki, poliesterren (PET) eta poliuretanoen (PU) hondakinak bihurtuz, erreakzio-parametroak eta -baldintzak kontrolatuz eta lortutako produktuen maila hobetuz, balio erantsi handiko monomeroak eta produktu kimikoak sortuko ditu, erabilera zorrotzenetarako mailak lortuko dituelako, hala nola erretxina berrien sintesirako.

SMYRNA proiektuaren bidez euskal industriak uren tratamenduaren arloan duen lehiakortasuna mantendu nahi da, sinergiak eta gaitasun teknologikoak batuz.

GAIKER Zentro Teknologikoak, Basque Research & Technology Allianceko (BRTA) kidea, “SMYRNA, urak fisiko-kimikoki tratatzeko material eta prozesu berriak” proiektuan parte hartzen du.

Proiektuaren helburua proposamenean parte hartzen duten sei erakundeen sinergiak eta gaitasun teknologiko osagarriak batzea da, uren tratamenduaren arloan material aurreratu eta prozesu berriak garatzeko. Horrela, tratamendu fisiko-kimikoko teknologietan material eta prozesu berriak garatuz, euskal industriari bultzada berria eman nahi zaio.

Uren tratamenduari buruzko araudi berriak uraren berrerabilera eta eraginkortasuna bultzatzen ditu prozesu industrialetan. Hori dela eta, datozen urteetan, prozesu horiek egokitu egin beharko dira ura aurrezteko -ura berrerabiliz- eta baliabideak berreskuratzeko -material kritikoetatik, hondakin-lohietatik eratorritako biomaterialak, eta biogasetik sortutako energia. Isurtzeko tratamendu batetik berrerabiltzeko tratamendu batera igaro behar da, eta horrek erronka hauei aurre egiteko beharra dakar:
•    Egungo ur-arazketako prozesuen eraginkortasuna hobetzea ahalbidetuko duten material berriak garatzea.
•    Uretan dauden eta ingurumenerako edo osasunerako arriskutsuak izan daitezkeen konposatu emergenteak ezabatzea.
•    Tratatutako uraren osasun-kalitatea bermatzea.
•    Prozesuen eraginkortasun energetikoa hobetzea, korronte likidoetan balio erantsiko konposatuak berreskuratzea erraztuz.

Erronka horiei aurre egitean, jasangarritasuna helburu izan behar da, konposatu kimikoen eta energiaren erabilera murriztuko duten teknologiak erabiliz.

SMYRNA proiektuak erronka horiei erantzun nahi die, eta, horretarako, zenbait ildo estrategiko proposatzen ditu, hala nola urak tratatzeko sistemetan erabiltzeko materialak garatzea, eta urak tratatzeko eskema berriak garatzea kezka berriak sortzen ari dituzten konposatuak (CEC) eta patogenoak ezabatzeko eta materiak berreskuratzeko.

SMYRNA proiektua Eusko Jaurlaritzak finantzatzen du Elkartek Elkarlanean egindako Ikerketarako laguntza-programaren barruan, eta urte honen amaieran amaituko da. GAIKER, tratamendu fisiko-kimikoen sistema aurreratuetan eta urak berrerabiltzeko teknologietan aditua denez, alde batetik, urak iragazteko eta tratatzeko material berriak garatzeaz arduratuko da, fabrikazio gehigarria erabiliz eta mintzak aldatuz, eta, bestetik, garatutako material horien saiakuntza eta baliozkotzea egiteaz. Bestalde, kutsatzaile berrien zenbait tratamendu ebaluatuko ditu, oxidazio aurreratuko, adsortzioko eta mintz bidezko banaketako prozesuen bidez. Halaber, urak desinfektatzeko eta bere toxikotasuna ebaluatzeko hainbat sistema egingo ditu. Eta, azkenik, urak tratatzeko ebaluatutako prozesu berritzaileen simulazioak eta ereduak egiten lagunduko du.

Apirilaren 16tik 18ra In-cosmetics Globalen edizio berri bat egingo da Parisen

 Apirilaren 16tik 18ra GAIKER, Basque Research & Technology Alliance (BRTA) erakundeko kidea, aurten Parisen egingo den In-cosmetics Globalen edizio berri batean egongo da. 

Zentroak dermokosmetikaren arloko I+G+B zerbitzuen eskaintza aurkeztuko du Goya Análisis doktorearekin eta Anmar Clinical Servicesekin partekatutako stand batean. In-cosmetics Global norberaren zaintzarako osagaien munduko ekitaldi nagusia da. Topaketak osagaien hornitzaile nagusiak eta produktu bukatuen fabrikatzaileak biltzen ditu, biharko abangoardiako kosmetikoak inspiratzeko.
Bisita gaitzazu 1U85 standean!

>> Gehiago jakiteko

Plastic2Plastic proiektuarekin plastikozko hondakinetatik pirolisi-olioak lortu dira, findegien sektorean eta industria petrokimikoan lehengai gisa erabiltzeko.

Plastic2Plastic proiektuan Basque Research & Technology Alliance, BRTAko kide den GAIKER Zentro Teknologikoak, Zorroza Gestión S.L. (proiektuaren buru) eta Petronor enpresek hartu dute parte, eta emaitza onak lortu dituzte.

Plastic2Plastic 2021ean hasi zen, zabortegira zihoazen plastikozko hondakinetatik produktu berriak fabrikatzeko kalitate nahikoa zuten pirolisi olioak lortzeko helburuarekin. Horrela, hondakin horiei bigarren bizitza bat ematea eta lehengai eta energia aurreztea lortuko litzateke.

Izan ere, REQUIPLAST proiektuaren jarraipena zen; bertan, GAIKERek eta PETRONORek plastiko-eduki handia duten errefus-korronteen aprobetxamendua aztertu zuten, pirolisi prozesuaren bidez konposizio homogeneo eta kontrolatuko olioak lortzeko.

Ikerketa berri hau Eusko Jaurlaritzako Ingurumen Jarduketarako Sozietate Publikoak (Ihobe) finantzatu du, ekoberrikuntza zirkularreko laguntzen programaren barruan, eta REQUIPLAST proiektuan aurkitutako funtsezko zenbait alderditan sakondu du, hala nola:
Hondakinak pirolisi-prozesurako prestatzea eta egokitzea, konposizio- eta morfologia-irizpideetan oinarrituta.
Tenperatura eta presio baldintza ertainetan egin ahal den prozesu sendo eta erraz bat garatzea, pirolisi-olioa egokitzeko fabrikak onartutako kalitatezko pirolisi-olioei errendimendu handia ematea ahalbidetzeko, ondoren material gisa aprobetxatzeko.
Sortutako olioen kalitatea egiaztatzea eta kontrolatzea.
Azpiproduktuen balorizazio materialerako aukeren ebaluazioa, esaterako ikatz-solidoarenak.

GAIKERek esperientzia handia du plastikoak kimikoki birziklatzeko prozesuak garatzen, eta, gainera, bereizteko eta egokitzeko ekipo ugari eta pirolisi-prozesu termokimikoak eskalatzeko instalazio pilotuak ditu. Horregatik, proiektu honetan hondakina bereizteko eta egokitzeko prozesuak definitzeaz eta pirolisi selektiboko prozesua optimizatzeaz arduratu da. Era berean, lortutako pirolisi olioak eta ikatz-produktua aztertu ditu, balorizazio materialaren aukerak ebaluatzeko.